Хар-Ус нуурын байгалийн цогцолборт газар нь ховор ан амьтан хамгаалах чиглэлээр эрчимтэй үйл ажиллагаа явуулдаг.

Тусгай хамгаалалттай газар нутагт зохих эрхийн бичиг, зөвшөөрөлгүй ахуйн болон үйлдвэрлэлийн зориулалтаар загас барих нь хууль зөрчсөн үйлдэл юм. Тиймээс загас нүүдэллэх хугацаа болж байгаатай холбогдуулан Хар-Ус нуурын байгалийн цогцолборт газар болон бусад холбогдох байгууллагын мэргэжилтнүүдээс бүрдсэн ажлын хэсэг томилогдож, гуравдугаар сарын 01-нээс дөрөвдүгээр сарын 15-ны өдөр хүртэлх хугацаанд тодорхой дөрвөн цэгт эргүүл хяналт хийж байна. Ингэхдээ загас нүүдэллэх гол цэгт буюу Хар нуур, Хар ус нуур, Цахиуртын хоолой, Шижигтийн хавцал гэх дөрвөн газарт хяналтын байр байгуулжээ. 

Хар-Ус нуурт монгол хадран, алтайн шар сугас, нохой сугас, давжаа сугас гэсэн дөрвөн төрлийн 60 мянга орчим загас байдаг. Үүний 70-80 орчим хувийг монгол хадран, алтайн шар сугас эзэлж байна гэсэн судалгаа бий. 

Өнгөрсөн 2019 онд Ховд аймгийн хэмжээнд загас барих зөвшөөрөл олгоогүй. Тиймээс энэ өвөл буюу 2019 оны 10 дугаар сараас 2020 оны 03 дугаар сар хүртэл хугацаанд Хар-Ус нуурын байгалийн цогцолборт газрын байгаль хамгаалагч нар долоо хоногийн ээлжийн хуваарь гаргаж, эргүүл хяналт тавьж ажилласан байна. Энэ үеэр 800 гаруй загасны тор илрүүлж, устгасан. Улмаар торонд орсон загасыг буцаан тавьжээ. Мөн 600 орчим машинтай иргэд дэгээ ашиглан загас барьж буй зөрчил илрүүлсэн аж. Ихэвчлэн аймгийн төв болон Буянт, Мянгад, Чандмань, Дөргөн сумын иргэд зөрчил гаргасан байжээ. Мэргэжлийн байгууллагын зүгээс иргэд ахуйн болон үйлдвэрлэлийн зориулалтаар загас барихгүй байхыг уриалсан юм.  
Орон нутагт загас хамгаалал, хууль бус агнууртай тэмцэх чиглэлээр мэргэжлийн байгууллагууд хэрхэн ажиллаж байгаа талаар Хар-Ус нуур орчмын УТХГН-ийн хамгаалалтын захиргааны дарга С.Батмөнхөөс тодруулав. 

ВИДЕО: