XVII жарны "Элдэв Эрдэнэт" хэмээх модон Могой жилийн сар шинийн босгон дээр 70 гаруй малчин өрх “Аймгийн аварга”-аар шалгарсан. Тэдний нэг нь Улсын тэргүүний Зэрэг сумын Бургасан багийн малчин З.Гонгоржав, Б.Саруултуяа нар юм.

Аварга малчин өрхийн шагналыг өчигдөр /2025.02.26/ аймгийн Засаг дарга, Баруун бүсийн зөвлөлийн дарга М.Амарсанаа гардуулж баяр хүргэлээ. Энэ үеэр сум, багийн удирдлагууд мөн баяр хүргэж хүндэтгэл үзүүлэв.

З.Гонгоржав аав, ээжийгээ даган бага наснаасаа мал маллах арга ухаанд суралцжээ. Өрх тусгаарлахдаа 200 орчим толгой малтай айл болж байсан бол одоо таван төрөлд нь өсгөж байна. Бог голдуу малтай. Увсын баяд үүлдрийн хуц, Баян-Өлгийн улаан ухнаар малаа чанаржуулдаг. Үүнээс гадна жилийн дөрвөн улиралд нүүдэллэж голдуу уулаар оторлон малаа малладаг хэмээн ярилаа.



Аваргынх энэ хавар 300 гаруй төл хүлээн авахаар бэлтгэлээ базаажээ.