Уур амьсгалын ногоон сангийн санхүүжилтээр Байгаль орчин, уур амьсгалын өөрчлөлтийн яам, Хүнс, хөдөө аж ахуй, хөнгөн үйлдвэрийн яам, НҮБ-ын Хөгжлийн хөтөлбөр хамтран “Монгол орны хөдөөгийн иргэдийн уур амьсгалын өөрчлөлтөд дасан зохицох чадамж болон эрсдэлийн менежментийг боловсронгуй болгох нь” (АДАПТ) төслийг Ховд, Завхан, Дорнод, Сүхбаатар  аймагт хэрэгжүүлж байгаа. 

Ховд аймагт хэрэгжиж буй Адапт төслийн үйл ажиллагаатай газар дээр нь очиж танилцах зорилгоор НҮБ-ын туслах, Нарийн бичгийн дарга бөгөөд НҮБ-ын Хөгжлийн хөтөлбөрийн Ази, Номхон далайн бүс хариуцсан захирал Канни Вигнаража, УИХ-ын гишүүн Э.Болормаа нар орон нутагт ажиллав.

Энэ хүрээнд Хатагтай Канни Вигнаража болон албаны бусад төлөөллийг аймгийн Засаг даргын үүрэг гүйцэтгэгч Х.Батболд хүлээн авч уулзлаа. Мөн уулзалтад төслийн гол орлолцогч байгууллагууд болох аймгийн Онцгой байдлын газар, Хүнс хөдөө аж ахуйн газар, Байгаль орчин, аялал жуулчлалын газар, Ховд ус, цаг уур, орчны шинжилгээний газрын дарга нар, Ховд, Завхан, Сүхбаатар, Дорнод аймгийн төслийн зохицуулагчид, төсөл хэрэгжигч зарим сумдын Засаг дарга нар оролцлоо. 

Уулзалтаар талууд орон нутагт хэрэгжиж буй дасан зохицох ажлуудын үр дүн, орон нутгийн оролцоо, малчдын идэвх, хамтын ажиллагааны талаар хэлэлцэн санал солилцов. Уулзалтын төгсгөлд Адапт төслийн хүрээнд чадавхыг бэхжүүлэх зорилгоор аймгийн УЦУОШТөвд болон Хар нуур-Ховд голын сав газрын захиргаанд техникийн дэмжлэг үзүүлэн "БАТЛАМЖ" гардуулж амжилт хүслээ.