НҮБ-ын Суурин зохицуулагч ноён Яап ван Хиердэн гэргийн хамтаар Ховд аймагт ажиллаж байна. Албаны төлөөллийг аймгийн Засаг даргын орлогч Л.Энхбаяр холбогдох салбарын удирдлага, мэргэжилтнүүдийн хамтаар өнөөдөр /2026.05.05/ хүлээн авч уулзлаа. 

Энэ үеэр НҮБ-ын чиглэлээр орон нутагт хэрэгжиж буй төсөл, хөтөлбөр, хөрөнгө оруулалт, үр дүн, цаашдын хамтын ажиллагааны чиглэлээр санал солилцов.

НҮБ-ын суурин зохицуулагчийн хувьд харьяа агентлагуудыг нэгдсэн удирдлагаар ханган зохицуулах үүрэгтэй. Үүнээс гадна Улаанбаатар хотод үйл ажиллагаа явуулдаг Олон улсын болон түншлэлийн байгууллагуудын үйл ажиллагааг уялдуулах, зохицуулах чиглэлд манлайлан ажилладаг. 

Энэ хүрээнд улс орны хөгжлийг дэмжих ялангуяа хөгжлөөс хэн нэгнийг ч хоцроохгүй байх, хүн бүхнийг хөгжүүлэхийн тулд юу хийж болох, орон нутагт хийж хэрэгжүүлж буй сайн жишиг юу байгааг газар дээр нь үзэж танилцах улмаар цаашдын хамтын ажиллагаагаа тодорхойлоход энэ удаагийн орон нутгийн томилолтын гол зорилго чиглэж байгааг онцоллоо. 

НҮБ-ын Суурин зохицуулагч ноён Яап ван Хиердэн Ховд аймагт ажиллах үеэрээ эрүүл мэнд, боловсролын зарим байгууллагаар орлоо. 

Эмнэлгийн төрөлжсөн мэргэжлийн тусламж, үйлчилгээний чанар, хүртээмж, хүний нөөцийн чадавх, хөгжил, сургалтын хэрэгцээ, технологи, оношилгоо, эмчилгээний шинэчлэл, тоног төхөөрөмжийн хэрэгцээ, ашиглалтын талаар мэдээлэл авлаа.



Мөн орон нутагт тулгамдаж буй асуудлууд, эх, хүүхдийн эрүүл мэндийн нөхцөл байдал, олон улсын хамтын ажиллагааны боломжийн талаар харилцан ярилцаж, санал солилцов.

Үүнээс гадна Үйлдвэр технологийн парк, Агро паркаар орж иргэдийн амьжиргааг дэмжих, хүнсний ногоо тариалах чиглэлээр хийж буй ажилтай газар дээр нь очиж танилцлаа.