Засгийн газрын 36 дугаар тогтоолоор Төрийн хошой шагналт, зууны манлай романч Чадраабалын Лодойдамбын мэндэлсний 100 жилийн ойд зориулан БОЛОР ЦОМ-35 яруу найргийн наадмыг 12-р сарын 15 ны өдөр Говь-Алтай аймгийн Алтай хотод зохион байгуулсан. Наадамд 32 найрагч шүлгэн хүлгээ уралдуулсанаас Ховд аймгийн Дуут сумын уугуул яруу найрагч М.Отгонбаяр тэргүүн байранд шалгарч "Эгшиглэнт эхийн хишигт найрагч"-аар тодорч адис хүртсэн. Одоогоос 8 жилийн өмнө буюу 2009 оны "БОЛОР ЦОМ" наадамд Дуут сумын харьяат яруу найрагч Х.Эрдэнэбаатар түрүүлж байсан бол энэ жилийн "Болор цом"-ын эзэн найрагч мөн Дуут сумаас төрлөө. Ийнхүү Ховдчууд "Эгшиглэнт эхийн хишигт" 2 найрагчтай болсон түүхэн мөчийг тохиолдуулан "Болор цом-35" яруу найргийн наадмын Тэргүүн байрын шагналт, яруу найрагч М.Отгонбаярыг аймгийн Засаг дарга Д.Галсандондог, Засаг даргын орлогч Ш.Батсүх, Ч.Уранчимэг, ЗДТГ-ын дарга Б.Ганболд, аймгийн БСУГ-ын дарга М.Пүрэвхүү нар болон аймгийн ИТХ-ын зарим төлөөлөгчид хүлээн авч баяр хүргэн, хүндэтгэл үзүүллээ.