Өнөөдөр /2026.06.18/ аймгийн Онцгой комиссын дэргэдэх "Шуурхай штаб"-ын гишүүд хуралдлаа.



Хурлаар:

Булган, Үенч суманд гарсан мал, амьтны гоц халдварт шүлхий өвчний нөхцөл байдал хариу арга хэмжээ, хорио цээрийн дэглэмийн үр дүн цаашид анхаарах асуудлын талаар ярилцав. Булган суманд халдварын тархалт нэмэгдсээр байгаа бол Үенч суманд харьцангуй хумигдах төлөвтэй байна. Зэргэлдээх Баян-өлгий аймгийн хэд хэдэн суманд халдвар шинээр бүртгэгдсэн, нөхцөл байдал хүнд байгаа. Тийм учраас эрсдэлээс сэргийлэх зорилгоор:

-Хорио цээрийн дэглэмийг сайтар баримтлах, 

-Иргэдэд зорчих зөвшөөрөл олгож байсныг цуцалж "Хяналтын пост"-уудын үйл ажиллагааг илүү сайжруулах, 

-Баян-өлгий аймаг руу ачаа, бараа тээвэрлэх, аялах зорилгоор зорчихгүй байх, 

-Увс, Завхан аймаг Ховд аймгаас очих хөдөлгөөнийг хориглосон шийдвэр гаргасан учраас дээрх аймаг руу зорчихгүй, аялахгүй байх зэрэг шийдвэрийг гаргалаа. 

"Шуурхай штаб"-ын хуралд аймгийн Засаг дарга, Онцгой комиссын дарга М.Амарсанаа оролцож мэдээлэл солилцов. Тэрбээр:

-Голомтын хоёр сумаас өөр сумдад халдвар алдаагүй байгаа нь гаргасан шийдвэр, хариу арга хэмжээний ажлын нэг үр дүн гэдгийг онцлоод холбогдох байгууллагын удирдлагуудад зарим асуудлаар үүрэг, чиглэл өглөө. 

Булган, Үенч суманд гарсан малын гоц халдварт шүлхий өвчний  нийтдээ 10 голомтод 156 өрхийн 1172 үхэр, 47 хонь, 87 ямаа бүгд 1306 толгой мал өвчилж 126 өрхийн 1002 үхэр 34 хонь 79 ямаа бүгд 1115 толгой мал устгасан байна.