Монгол Улсын Шинэ Үндсэн хууль батлагдсаны 27 жилийн ойн баярт зориулсан Ховд аймгийн алдар цолтой хүчит 64 бөхийн барилдаан энэ сарын 12-ны өдөр аймгийн БТСГ-т боллоо. 

Нээлтийн үйл ажиллагаанд Монгол Улсын Их хурлын гишүүн, Ховд аймгийн Улаанбаатар хот дахь Нутгийн зөвлөлийн дарга С.Бямбацогт, аймгийн ИТХ-ын дарга Г.Пүрэвганди, аймгийн ИТХ-ын Нарийн бичгийн дарга Б.Сандагсүрэн, Биеийн тамир, спортын газрын дарга Г.Цэдэнбал болон үе үеийн аймаг, сумын цолтой бөхчүүд, бөх сонирхогчид оролцов.

ВИДЕО:

Бөхийн барилдаанд аймгийн арслан С.Ганхуяг, аймгийн арслан Б.Батмөнхөөр манлайлуулсан хүчит 64 бөх бяр хүч, авхаалж самбаагаа сорин барилдсанаас Ховд сумын харъяат аймгийн начин Ж.Мухтар 6 даван түрүүлж, Баян-Өлгий аймгийн Улаанхус сумын харъяат сумын заан Ховд аймгийн Цагдаагийн газрын бөх Ш.Эркенбек 5 даван үзүүрлэж, Дөргөн сумын харъяат аймгийн начин Т.Эрдэнэдалай, Зэрэг сумын харъяат аймгийн начин Онцгой байдлын газрын бөх С.Баянжаргал нар шөвгөрч, уран барилдаант бөхөөр Мянгад сумын харъяат сумын заан Г.Галдөл шалгарлаа.