Хамгийн сайн халамж бол Хөдөлмөр эрхлэлт юм. 

Тиймээс Гэр бүл, Хөдөлмөр нийгмийн хамгааллын яамнаас 2025 оныг “Хөгжлийн бэрхшээлтэй иргэдийн хөдөлмөр эрхлэлтийг дэмжих жил” болгон зарлаж нээлтийн арга хэмжээг өнөөдөр /2025.03.25/ улс орон даяар зохион байгууллаа. 

Аймгийн Засаг даргын Тамгын газар, Хөдөлмөр, халамж үйлчилгээний газар, Хөгжлийн бэрхшээлтэй хүний хөгжлийн төв, ТББ-уудтай хамтран зорилтот жилийн нээлтийг зохион байгуулж  хэрэгжүүлэх төсөл, арга хэмжээг зорилтот иргэдэд танилцуулав. 

Өнгөрсөн /2024/ онд аймгийн ХХҮГ-т ажил хайгч 2400 иргэн бүртгүүлснээс хөгжлийн бэрхшээлтэй 100 гаруй иргэн байжээ. 

Бүртгүүлсэн нийт иргэдийн 1700 гаруй нь байнгын болон түр ажлын байртай болсон бол хөгжлийн бэрхшээлтэй 12 иргэнийг ажилд зуучилсан. 

Мөн 30 гаруй иргэнийг хөтөлбөрт хамруулж хөдөлмөр эрхэлж орлогоо нэмэгдүүлэхэд нь хамтран ажилласан гэж аймгийн ХХҮГ-аас мэдээллээ. 

Хөгжлийн бэрхшээлтэй иргэд халамж аваад зүгээр суух биш ажил хөдөлмөр эрхэлж орлогоо нэмэгдүүлэх, сонирхолтой байдаг. 

Үүнийг нь дэмжиж илүү олон хүнийг ажлын байраар хангахад “Хөгжлийн бэрхшээлтэй иргэдийн хөдөлмөр эрхлэлтийг дэмжих жил”-ийн хүрээнд хийж хэрэгжүүлэх ажил, бодлого, зорилт чухал ач холбогдол өгнө гэж үзэж байна.