Ховд аймаг 8413 малчин өрхтэй. Өдгөө мал аж ахуйн салбарт 13300 малчин ажиллаж байна. Үүний 26.7 хувь нь залуу малчид буюу 18-35 насныхан юм.
Өчигдөр /2024.06.06/ Ховд аймагт болсон
“Залуу малчдын зөвлөгөөн”-д тэдгээрийн төлөөлөл 150 гаруй залуу малчин оролцлоо.
Оролцогчид мал аж ахуйн үйлдвэрлэлд анхаарах, байгаль, цаг агаарын өөрчлөлтөд дасан зохицох, малын тоо толгойг тодорхой түвшинд барих, малын үүлдэр угсааг сайжруулах, таваарлаг шинж чанарыг нэмэгдүүлэх, тооноос илүү чанарт анхаарч, бэлчээрийн даац хэтрэлтийг бууруулах чиглэлээр санал хэлж, тулгамдаж буй асуудлын гарц шийдлийг эрэлхийлжээ.
Ховд аймаг “Залуу малчин, тариаланч” дэд хөтөлбөрийн хүрээнд олон чухал ажил хэрэгжүүлж байгаа. Тухайлбал, "Хөгжил" политехник коллежид нэг жилийн сургалттай Малчны ангийг нээсэн бөгөөд одоогоор Дарви, Мөст сумаас 30 гаруй хүн хамрагдаж, малчин мэргэжилтэй болжээ.
Мөн мал аж ахуй, газар тариалангийн чиглэлээр 183 хоршоо, нөхөрлөл бий болж, үйл ажиллагаа явуулж байна. Түүнчлэн өнгөрсөн хугацаанд малчдад зориулсан сургалт, зөвлөгөөн, уулзалтыг үе шаттай зохион байгуулсан бөгөөд давхардсан тоогоор 11 мянган иргэнд эрүүл мэнд, төрийн үйлчилгээг нэг цэгээс хүргэсэн байна.
Мөн "Залуу малчин, тариаланч өрх" аймгийн дэд хөтөлбөрийн хэрэгжилт, нийгмийн даатгалын ач холбогдол, мал эмнэлгийн зарим үйлчилгээний талаар танилцуулж, Монгол Улсын аварга малчдын ажлын туршлага, амжилт ололтоос хуваалцлаа.
