УИХ-ын гишүүн Ш.Адьшаа орон нутагт ажиллах үеэрээ “Шинэ Ховд Жаргалант” ТҮК-ийн ажилтнуудтай уулзалт хийж, тэдний өмнө тулгамдаж буй асуудал, санал хүсэлтийг сонслоо.  

Тус байгууллагын тохижилт үйлчилгээний ажилчид сарын 420 мянган төгрөгийн цалин авдаг байна. Энэ нь өнөөгийн энэ нийгэмд амьжиргаагаа залгуулахад хэцүү байгааг тэд уулзалтын үеэр онцолжээ. Тодруулбал, авч байгаа цалин амьдралд хүрэлцэхгүй, нийгмийн баталгаа алдагдсан, сургалтын төлбөрийг нь төлж дийлэхгүйн улмаас үр хүүхдээ сургаж чадахгүйд хүрсэн, баяр ёслолоор амардаггүй ажилладаг хэр нь илүү цаг, нэмэгдэл авдаггүй, адилхан чиг үүрэгтэй төрийн өмчит “Хот тохижилт” компани цалингаа нэмээд байхад орон нутгийн өмчийн компани гээд цалин нэмдэггүй, цалингийн зээл, хэрэглээний зээлээ төлөөд ямар ч мөнгөгүй үлддэг зэрэг асуудлыг хөндөж, цалингаа нэмэгдүүлэх хүсэлтэй байгаагаа уламжилсан байна.    

Иймээс хамгийн хүнд хүчир ажлыг нугалж байгаа эдгээр ажилчдын цалин хангамжийг нэмэгдүүлэх тал дээр анхаарч холбогдох газруудад уламжилж ажиллахаа илэрхийлжээ.