Байгаль орчныг хамгаалах тухай багц хуулийн хэрэгжилтийг хангах, байгалийн нөөц баялаг, биологийн олон янз байдлыг хамгаалах, нөхөн сэргээх, зүй зохистой ашиглах, эзэмшихтэй холбоотой гэмт хэрэг зөрчлийг бууруулах, иргэдийн эрх зүйн мэдлэг, мэдээллийг дээшлүүлэх, байгаль орчны тэнцэл алдагдахаас урьдчилан сэргийлэх хамтын ажиллагааг сайжруулах зорилгоор аймгийн ИТХ-ын дэргэдэх Хүрээлэн буй орчны эсрэг гэмт хэргээс урьдчилан сэргийлэх дэд зөвлөл, Байгаль орчин, аялал жуулчлалын газар хамтран өнөөдөр /2021.11.22/ тус хэлэлцүүлгийг зохион байгуулж байна.

Хэлэлцүүлгийг нээж аймгийн ИТХ-ын Нарийн бичгийн дарга, Хүрээлэн буй орчны эсрэг гэмт хэргээс урьдчилан сэргийлэх дэд зөвлөлийн дэд дарга Б.Сандагсүрэн үг хэлж, хэлэлцүүлэгт оролцогчдод амжилт хүслээ. 

Тус хэлэлцүүлэгт Байгаль орчны салбар байгууллагууд, аймгийн хэмжээнд үйл ажиллагаа явуулж байгаа төрийн болон төрийн бус байгууллагууд МУНБЦГ-ын хамгаалалтын захиргаа, Мөнххайрханы Байгалийн цогцолборт газрын хамгаалалтын захиргаа, Зүүн гарын говийн хамгаалалтын захиргаа, Үенч-Бодонч, Булган голын сав газрын захиргаа зэрэг байгууллагууд танхим болон цахимаар хамрагдаж байна.

Энэ үеэр байгаль орчныг хамгаалах багц хуулийн хэрэгжилтийг хангах, байгалийн нөөц баялаг, биологийн олон янз байдлыг хамгаалах, нөхөн сэргээх, зүй зохистой ашиглах эзэмшихтэй холбоотой гэмт хэрэг, зөрчлийг бууруулах зэрэг хэд хэдэн  асуудлыг хэлэлцэж, санал бодлоо солилцов.
Хэлэлцүүлгийн үр дүнд Байгаль орчны чиглэлээр орон нутагт үйл ажиллагаа явуулж буй төрийн болон төрийн бус байгууллагуудын хамтын ажиллагаа болон сургалт сурталчилгаа, хяналт шалтгалт, урьдчилан сэргийлэх арга хэмжээний чанар хүртээмж сайжирна гэж зохион байгуулагчид үзэж байна.