Дэлхийн зөн олон улсын байгууллагын Ховд орон нутгийн хөтөлбөрөөс ерөнхий боловсролын сургууль бүр сэтгэл зүйч ажиллуулж байгаатай холбогдуулан зорилтот таван сумынхаа ерөнхий боловсролын 11 сургуулийн сэтгэл зүйч нарын өрөөний тохижилтод дэмжлэг үзүүллээ. Өөрөөр хэлбэл, дөрөвдүгээр сарын 07-ны өдөр Жаргалант сумын ерөнхий боловсролын 1, 2, 3, 6, 7 болон Цаст-Алтай, Прогресс сургууль, Дөргөн, Мянгад, Зэрэг, Манхан сумын сургуулийн сэтгэл зүйч нарын өрөөний тохижилтод дэмжлэг үзүүлэх замаар ширээ, сандал, шүүгээ, ус буцалгагч зэрэг зургаан төрлийн тавилга, эд зүйл  хүлээлгэн өгсөн юм.
Энэхүү ажилд нийт 22 сая 773 мянган төгрөгийн санхүүжилт зарцуулсан байна. 

Гэр бүл, хүүхдэд ээлтэй орчин бүрдүүлэхэд боловсролын салбарынхан чухал үүрэг гүйцэтгэдэг. Сургуульд сэтгэл зүйч ажилласнаар өсвөр үеийнхэнтэй холбоотой олон асуудлыг нээн илрүүлэх, урьдчилан сэргийлэх, сэтгэл зүйн тусламж шаардлагатай сурагчдад мэргэжлийн зөвлөгөө өгөх замаар эерэг нөлөөллийг бий болгох боломж бүрдэх юм. Энэ утгаараа сургуульд суурилсан сэтгэл зүйн зөвлөх үйлчилгээний чанар, хүртээмжийг нэмэгдүүлэх зорилтын хүрээнд сэтгэл зүйн зөвлөгөө өгөх стандарт жишиг өрөөг сургууль бүр тохижуулж, ажиллах сэтгэл зүйчийн практик ур чадварыг дээшлүүлэхэд анхаарч байгаа гэдгийг албаныхан онцлон хэллээ.

ВИДЕО: