Ховд аймгийн төвд  2-3 нийтийн тээврийн автобус их тойрог, хайрхан гэсэн хоёр чиглэлд  явж, зорчигчдод  үйлчилж байна. Сүүлийн үед автобусны зогсоолын саравч, хогийн сав хуучирч муудан, өнгө үзэмжээ алдаад байсан. Тэгвэл Дэлхийн байгаль хамгаалах сан \WWF\-гаас ан амьтныг хамгаалах чиглэлээр олон нийтийн үйл ажиллагааг идэвхжүүлэх, хүүхэд багачуудад экологийн боловсрол олгох, байгаль орчин, ховор амьтдыг хамгаалах сэтгэхүйг багаас нь төлөвшүүлэх  улмаар Ховд аймгийн төвийн өнгө үзэмжийг сайжруулах  зорилгоор 8 автобусны буудалд тохижилт  хийлээ.  

Энэ ажлын хүрээнд автобусны буудлуудын саравч, сандлыг будаж, байгаль орчин, ан амьтдыг хайрлан хамгаалах уриалга бүхий ирвэс, аргаль, бөхөн зэрэг ховор ан амьтдын зургаар чимсэн байна. 

Тухайн  амьтдын зургийг Баян-Өлгийн аймгийн ерөнхий боловсролын сургуулийн 10 дугаар ангийн сурагч Ш.Алтынбек гурван хоногийн хугацаанд зурсан ба ДБХС-ийн ажилтнууд 7 хоногийн хугацаанд 8 автобусны буудлыг тус зургаар тохижуулж, засварлажээ. 

Эдгээр зураг нь  Ховд аймгийн онцлог, давуу талыг илэрхийлэх мэдээлэл, түүхийг агуулж байгаа юм. Тухайлбал, Дэлхийн байгаль хамгаалах сан\WWF\-гийн Монгол дахь хөтөлбөрийн газраас Ховд аймгийн “Баатрын нуруу” хэмээх газарт хийсэн судалгааны камерт 4 гүемтэй ирвэс бүртгэж, Дэлхийд анхдагч болсон билээ. Энэхүү үйл явдын зурмал зургийг 30 айлын орон сууцны дэргэдэх автобусны буудал дээр дүрсэлсэн байна. Мөн автобусны буудлуудын хогийн савыг засварлажээ.