БСШУС-ын сайд Ц.Цогзолмаа Ховд аймагт ажиллах үеэрээ Дөргөн суманд ажиллалаа. Тэрээр тус сумын боловсрол, соёл урлагийн байгууллагуудын ажил байдалтай биечлэн танилцахын зэрэгцээ салбарынхаа багш, ажилтнуудтай уулзаж, тэдний санаа бодлыг сонсон мөн Засгийн газраас боловсрол, соёл урлагийн салбарт баримталж буй бодлого, авч хэрэгжүүлж буй арга хэмжээний талаар танилцуулан ажиллав. Дөргөн сум нь 724 өрх, 2885 хүн амтай. Уламжлалт ахуй, соёл, зан заншлаараа Монгол Улсын хэмжээнд өвөрмөцөд тооцогдох Дөрвөд ястан нийт хүн амын 99.6%-ийг эзэлдэг. Ерөнхий боловсролын 12 жилийн сургууль нь 480 хүүхдийн хүчин чадалтай ч одоогоор тус сургуульд 623 хүүхэд суралцаж байна. Үндсэн багш 40, нийт 67 хүний бүрэлдэхүүнтэй, хоёр хичээлийн байр, нэг дотуур байртайгаар үйл ажиллагаагаа хэвийн явуулж байна. Дотуур байранд 120 хүүхэд амьдардаг. Сумын цэцэрлэг 1979 онд байгуулагдаж байсан. 7 бүлэг, 28 багш ажилтантай, 213 хүүхэдтэй үйл ажиллагаагаа явуулж байна. Сумын хэмжээнд сургуулиас өмнөх боловсролд хамрагдах ёстой 303 хүүхэд байдгаас 88 хувийг СӨБ-д хамруулээ. Ирэх онд 40 жилийн ойгоо тэмдэглэх тус цэцэрлэг гал тогооны тоног төхөөрөмж, дуу хөгжмийн кабинетын тоног төхөөрөмж, хүүхдийн тоглоом наадгай зэрэг дотоод тохижилтын санхүүжилтийн асуудлыг шийдвэрлэж өгөхийг салбарын сайдаас хүслээ.
Сумын Соёлын төв 1959 онд Улаанбулан нэртэйгээр байгуулагдаж байсан бол 2000 оноос Соёлын төв болон өргөжсөн. Энэ оны төсвийн хөрөнгө оруулалтаар шинэ Соёлын төвийн барилга баригдаж байгаа бөгөөд БСШУС-ын сайд Ц.Цогзолмаа Соёлын төвийн барилгын ажлын явцтай биечлэн танилцаж 2019 оны гуравдугаар улиралд багтааж ашиглалтанд оруулахыг гүйцэтгэгч компанид үүрэг болголоо. Ингэснээр Дөргөн сум ирэх онд 1300 орчим ам метр талбайтай хоёр давхар, орчин үеийн шийдэлтэй Соёлын төвтэй болох юм.
