Дөргөний Усан Цахилгаан Станц үүсч хөгжсөний түүхт 10 жилийн ойн баяр 08 дугаар сарын 14-ны өдөр Дөргөн сумын Соёлын төвд боллоо. Ойн баярын нээлт, хурлын үйл ажиллагаанд ЭХЯ-ны Төрийн нарийн бичгийн дарга ББЭХС ТӨХК-ийн ТУЗ-ийн дарга З.Мэндсайхан, БОАЖЯ-ны Хүрээлэн буй орчин, байгалийн нөөцийн удирдлагын газрын дарга Г.Нямдаваа,  Эрчим хүчний зохицуулах хорооны зохицуулагч Д.Бассайхан, ББЭХС ТӨХК-ийн гүйцэтгэх захирал Р.Нямтуул, аймгийн ИТХ-ын нарийн бичгийн дарга Б.Сандагсүрэн нарын албаны төлөөлөгчид болон станцын үе үеийн дарга,  ахмад ажилчид оролцов.

Аймгийн ИТХ-ын нарийн бичгийн дарга Б.Сандагсүрэн Дөргөний Усан цахилгаан станцын түүхт 10 жилийн ойн баярын мэндчилгээ дэвшүүлж, хүндэтгэл үзүүлэн, Ховд Дөргөн УЦС-ын хамт олонд үнэ бүхий зүйл хадгалуулсныг гүйцэтгэх захирал Д.Алтансүхд гардуулан өглөө. Мөн аймгийн “Хүндэт тэмдэг”-ээр А.Базаррагчаа, ерөнхий инженер Ц.Бат-Эрдэнэ нар, аймгийн “Хүндэт Өргөмжлөл”-өөр Жан Е, Т.Хүрэлчулуун, Х.Буянхишиг нарыг шагнаж урамшуулсныг гардуулан өгч баяр хүргэлээ.