Ховд аймгийн МАН-ын хорооны 38-р бага хурал маргааш буюу 3-р сарын 11-ний өдөр Ховд хотноо болох гэж байна. Тус хуралд Ховд аймгийн МАН-ын 10000 гаруй гишүүд буюу бүх сум, багийн МАН-ын хороо, үүрүүдээс сонгогдсон 229 төлөөлөгч оролцох юм. Одоогоос 4 жилийн өмнө буюу 2014 оны 02-р сарын 19-20 ны өдрүүдэд МАН-ын хорооны 37-р бага хуралдаж байсан бөгөөд 38-р хурлаар өнгөрсөн хугацаанд намын хорооны хийж хэрэгжүүлсэн ажил, амжилт ололт, алдаа оноогоо дүгнэн ярилцах, хяналтын хорооны тайланг хэлэлцэхээр төлөвлөжээ. Мөн дүрмийн дагуу аймгийн намын хороо болон хяналтын хороог шинэчлэн  байгуулахаар болсон байна. Өнгөрсөн хугацаанд аймгийн МАН-ын хороо нь 129 гишүүнтэй ажилласан бол энэ удаагийн хурлаар намын хорооны гишүүдийн тоонд өөрчлөлт оруулах, эсэх асуудлыг ч мөн хэлэлцэхээр болжээ. 38-р бага хурлаас шинэчлэн байгуулагдсан аймгийн МАН-ын хороо нь эн тэрүүнд намын хорооны дарга, дэд даргаа сонгох юм байна. Эх сурвалжийн мэдээлсэнээр одоогоор аймгийн ИТХ-ын дарга, аймгийн МАН-ын хорооны дэд дарга Г.Пүрэвганди, аймгийн ИТХ-ын төлөөлөгч, Тэргүүлэгч,  аймгийн МАН-ын хорооны Тэргүүлэгч Т.Жаргалсайхан, аймгийн ИТХ-ын төлөөлөгч, аймгийн МАН-ын хорооны Тэргүүлэгч Б.Дүгэржав, аймгийн ИТХ-ын төлөөлөгч, Тэргүүлэгч,  Булган сумын Засаг дарга Б.Амгаланбадрах нар намын даргад нэр дэвших гэнэ. Гэхдээ орон нутгийн хөгжил дэвшил, ард иргэдийн итгэл сэтгэл, намын эв нэгдлийг хангах үүднээс зарим нэр дэвшигчид нэрээ татах сурагтай байна. Намын журмын нөхөд, гишүүд дэмжигчид нь ч өнгөрсөнийг биш ирээдүйг харж асуудлаа ярилцсан, шийдвэрлэсэн "ЭВ НЭГДЭЛ"-ийн хурал болоосой хэмээн хүлээж байгаа нь мэдээж юм.