Аймгийн Засаг дарга М.Амарсанаа ирэх дөрвөн жилд баялаг бүтээгчид, хувийн хэвшлийнхийг дэмжиж ажиллахаар А/01 тоот захирамж гаргасан.

Хувийн хэвшил, баялаг бүтээгчдийг дэмжих чиглэлээр гаргасан захирамжийг хэрэгжүүлэхэд анхаарч хамтран ажиллахыг ч мөн зөвлөж чиглэл өгсөн. Тэгвэл өнөөдөр /2024.11.14/ хувийн хэвшлийнхний төлөөлөлтэй уулзаж санал солилцон тэдний дуу хоолойг сонслоо.

-Улс орны татварыг бүрдүүлж, ажлын байр бий болгох гол ачааг хувийн хэвшлийнхэн нуруундаа үүрдэг учраас анхны захирамжаа энэ салбарыг бага ч гэсэн дэмжиж, хөгжүүлэхийг зорьж гаргасан. Мөн Засаг даргын орлогч Э.Уртнасангаар ахлуулсан “АЖЛЫН ХЭСЭГ” байгуулан ажиллаж байгаа гэдгээ онцоллоо. 

Уулзалт, хэлэлцүүлэгт оролцсон бизнес эрхлэгчид шинээр томилогдсон удирдлагууд баялаг бүтээгчдээ дэмжихэд анхаарч байгаад талархалтай байгаагаа илэрхийлж ажлын амжилт хүслээ. Мөн орон нутагт үйлдвэрлэл үйлчилгээ эрхэлж бизнес хийхэд тулгамдаж буй асуудал, хүндрэл бэрхшээл юу байгаа, цаашид юуг засаж сайжруулах талаар саналаа хэллээ.

Тухайлбал,

-Төрийн байгууллагуудын ажлын уялдаа холбоо, мэргэжлийн холбоодын үйл ажиллагааг сайжруулах,

-Төсөл хөтөлбөр, төсөв хөрөнгийг оновчтой хуваарилах, зарцуулах, хянах, үр дүнг нь тооцдог байх,

 

-Орон нутгийн Оёдлын үйлдвэр, оёдолчдыг Уул, уурхайн компани, сургууль, цэцэрлэг, албан байгууллагуудтай холбож шаардлагатай байгаа зөөлөн эдлэл, ажлын хувцсыг нийлүүлэх боломжийг бүрдүүлэх,

-Газар тариалангийн үйлдвэрлэлийг хөгжүүлэх, Ховдын брэнд бүтээгдэхүүний чанар, сортод анхаарах. Тиймээс үрийн үйлдвэртэй болох гэх мэт салбар бүрд анхаарах, шийдвэрлэх асуудлуудаа танилцууллаа.

Аймгийн Засаг даргын орлогч Э.Уртнасангаар ахлуулсан “АЖЛЫН ХЭСЭГ” баялаг бүтээгчид, хувийн хэвшлийнхний саналыг сонсож, тулгамдсан асуудлыг судална. Мөн цаашид хийх ажлын төлөвлөгөө боловсруулж батлуулан ажиллах юм.