Соёлын яам, аймгийн Засаг даргын Тамгын газар, Соёл урлагийн газар хамтран олон угсаатны уламжлалт хувцасны хоорондын ялгааг таниулах, түгээн дэлгэрүүлэх, соёлын бүтээлч үйлдвэрлэл эрхлэгчдийг дэмжих, хувцас урлалыг хөгжүүлэх зорилготой
“Угсаатны хувцас урлахуй” сургалтыг 2023 онд 3 үе шаттай зохион байгуулсан.
Энэхүү сургалтад хамрагдаж амжилттай төгссөн Т.Ундрах, Д.Мөнхцэцэг нар угсаатны хувцас хэрэглэлийг язгуур хэв шинж, онцлогоор нь оёж олон нийтэд түгээн дэлгэрүүлэх хэрэгцээ шаардлага байгааг үндэслэн олон угсаатны дээл хувцасны “
Бум ундрах” салон байгуулж өнөөдөр /2024.01.19/ нээлтийн үйл ажиллагаагаа зохион байгууллаа. Салоны нээлтэд зориулж 8 угсаатны эрэгтэй, эмэгтэй 16 дээл хувцас оёж шагласан байв.
Цаашид олон угсаатны дээл хувцас урлал чиглэлээр дагнан үйлчилгээ үзүүлэхээс гадна угсаатны хувцасны онцлог хэв шинжийг агуулсан орчин үеийн хувцсыг мөн урлах юм.
Тус салон нь оёдолчин, эсгүүрчин, дизайнер гээд нийт 16 ажилтантай үйл ажиллагаа явуулах аж.
“Бум ундрах” салоны нээлтийн үйл ажиллагаанд аймгийн ИТХ-ын дарга Г.Пүрэвганди, ЗДТГ-ын дарга Б.Сандагсүрэн, СУГ-ын дарга М.Пүрэвхүү нар оролцож, салоны хамт олонд амжилт хүслээ.
