Баруун бүсийн төв Ховд аймаг дахь Бүсийн оношилгоо эмчилгээний төвийг түшиглэн
“Нярайн скрининг оношилгооны төв” байгууллаа.
Бусад аймгуудаас анхлан Ховд аймагт энэ төвийг байгуулж буйтай холбогдуулан НҮБ-ын Хүүхдийн сангийн Монгол дахь суурин төлөөлөгч Эваристе Коуасси Комлан болон Анагаахын шинжлэх ухааны үндэсний их сургуулийн захирал, Анагаах ухааны доктор профессор, Н.Хүрэлбаатар, Анагаахын шинжлэх ухааны үндэсний их сургуулийн Эмнэлэг хариуцсан дэд захирал, академич, анагаах ухааны доктор профессор Д.Цэрэндагва нарын албаны төлөөлөл Ховд аймагт ажиллаж байна.
Албаны төлөөллийг өнөөдөр /2023.09.15/ аймаг, орон нутгийн удирдлагууд хүлээн авч уулзлаа.
Энэ үеэр орон нутагт нэн шаардлагатай байгаа оношилгооны тэр дундаа хүүхдийн эрүүл мэнд, сайн сайхны төлөө сэтгэл гарган хөрөнгө оруулалт хийж буйд талархал илэрхийллээ.
Ховд аймагт жилд дунджаар 2000 гаруй нярай мэндэлдэг.
Аймгийн хэмжээнд Бодисын солилцооны скрининг оношилгоог 2023 оноос эхлэн хийж 8 сарын байдлаар 1075 нярайг хамруулжээ.
Сонсголын скрининг шинжилгээг төрсөн нярай бүрд сорил хийж, жилд дунджаар 1-3 нярайг Эх хүүхдийн эрүүл мэндийн үндэсний төв рүү илгээж, оношийг баталгаажуулсан байна.
“Нярайн скрининг оношилгооны төв”-тэй болсноор нярайг төрсний дараах хэдхэн хоногийн дотор төрөлхийн ба удамшлын зарим эмгэгтэй эсэхийг илрүүлж, төгс эмчлэн хөгжлийн бэрхшээлээс эрт үед нь сэргийлэх боломж бүрдэж байна. Мөн удамшлын ба төрөлхийн эмгэгээс үүдэлтэй өвчлөлийг багасгах нь эрүүл мэндийн төдийгүй, нийгмийн халамж, тусгай боловсролд зарцуулах зардлыг бууруулах нийгэм, эдийн засгийн ач холбогдолтойг онцлов.
