Ховд аймгийн Чандмань сумын нутаг, Дөргөн нуурын зүүн урд хөвөөнд байгуулагдсан "Дөргөн хатан" жуулчны эко баазад тухлан амрахыг урив. Тус эко бааз нь Ховд аймгийн төвөөс 195 км зайд оршидог. Нэг ээлжиндээ 50-60 хүн хүлээн авах боломжтой бөгөөд нар салхины эрчим хүчээр хангагдсан. Боловсон бие засах газар, халуун ус шүршүүртэй, орчин үеийн стандартад нийцсэн гал тогоо бүхий жуулчны эко бааз гэдгээрээ онцлогтой.

Энэхүү жуулчны эко баазыг TNC байгууллагын “Нутгийн иргэдэд түшиглэсэн байгаль хамгаалал” төслийн хүрээнд байгуулсан. Улмаар Ховд аймгийн Чандмань сумын Байгалийн нөөцийн хамтын менежментийн хоёр нөхөрлөлийн 50 орчим өрхийн гишүүд уг эко баазыг хариуцдаг. 

Тус эко бааз нь 2020 оны үйл ажиллагаагаа зургаадугаар сарын 01-ний өдрөөс эхэлж, амрагчдыг хүлээн авсаар байна. Өнгөрсөн жилийн судалгаагаар тус эко баазад гадаадын 1000 орчим, дотоодын 3500 гаруй иргэн гээд нийт 4500 гаруй хүн амарчээ.  

Тус эко бааз нь 18 гэртэй. 80-120 мянган төгрөгийн үнэ тарифийн дагуу үйлчилгээ үзүүлдэг.

“Дөргөн хатан”  жуулчны эко баазын хамт олон шинэ төрлийн коронавирусний халдвараас урьдчилан сэргийлж, ариутгал халдваргүйтгэл хийж байна. Мөн бүх гэр, гал тогоо, ариун цэврийн өрөө зэрэгт ариутгах шингэн байгаа болно. Тус эко баазаар зочилж, байгалийн өвөрмөц тогтоц бүхий газарт амрахыг хүсвэл 83177677, 88969694, 95110307 утасаар холбоо барих, дэлгэрэнгүй мэдээлэл авах боломжтой юм.