НҮБ-ын Хүн амын сангийн Нөхөн үржихүйн эрүүл мэндийн хөтөлбөрийн мэргэжилтэн Б.Цэдмаа, Өсвөр үе, залуучууд хариуцсан хөтөлбөрийн мэргэжилтэн Х.Баттуяа нарын албаны төлөөлөл Ховд аймагт ажиллаж байна.
Албаны төлөөллийг өнөөдөр /2025.04.02/ аймгийн Засаг дарга, Баруун бүсийн зөвлөлийн дарга М.Амарсанаа, Засаг даргын орлогч Л.Энхбаяр нар хүлээн авч уулзлаа.
Уулзалтын үеэр өнгөрсөн хугацаанд Ховд аймагт хийж хэрэгжүүлсэн ажил, төслийн үр дүн, цаашдын хамтын ажиллагааны талаар санал солилцов.
Цаашид ялангуяа өсвөр үеийнхэнд эрүүл мэндийн боловсрол олгох, эх, нярайн тусламжийг сайжруулах чиглэлд илүү хамтран ажиллахаар боллоо.
НҮБ-ын Хүн амын сангийн ажлын хэсэг энэ удаагийн томилолтын хугацаанд Эрүүл мэндийн газар, БОЭТ-ийн төрөх тасгаар орж ажилласан байна.
Үүнээс гадна Булган, Зэрэг суманд ажиллаж Люксембургийн төслийн санхүүжилтээр хэрэгжүүлж буй “Сэргийлэх боломжтой эхийн болон перинатал эндэгдлийг тэглэхэд дэмжлэг үзүүлэх” төслийн хэрэгжилтийн явцтай танилцаж орон нутгийн удирдлагуудтай санал солилцжээ.
2023 оноос хэрэгжүүлсэн төсөл үр дүнтэй байвал бусад сумдад хэрэгжүүлэх боломжтойг НҮБ-ын Хүн амын сангийн мэргэжилтнүүд яриандаа онцоллоо.
Мөн ХПВ /Хүний хүний папиллома вирус/ вакцины хамрагдалтын одоогийн нөхцөл байдалтай танилцсан байна.