Волейболын спортыг олон нийтэд сурталчилан таниулах, хөгжүүлэх, ахмад тамирчдыг алдаршуулах, уран гоё тоглолтыг нь залуу хойч үед өвлүүлэх зорилгоор аймгийн БТСГ, Волейболын холбоо, Булган сумын ИТХ, ЗДТГ, Булган-Алтайн Шонхор волейболын холбоо хамтран ахмад волейболчдын аймгийн аварга шалгаруулах “ХОВД-2020” тэмцээнийг зохион байгуулах гэж байна. Энэ оны 09-р сарын 04-06-ны өдрүүдэд Булган сумын Спорт цогцолборт зохион байгуулах энэ удаагийн тэмцээнийг Ардын боловсролын тэргүүний ажилтан, ахмад багш, волейболын спортын 1-р зэргийн тамирчин Моломын Мөнхөө агсны нэрэмжит болгон зохион байгуулах аж.
Тэмцээнийг 40-49, 50-иас дээш насны эрэгтэй, 35-49, 50-иас дээш насны эмэгтэй гэсэн 2 насны ангилалаар зохион байгуулах юм байна. Уг тэмцээнийг аймгийн Онцгой комиссын зөвшөөрлөөр, "COVID-19" цар тахалтай тэмцэх, халдвараас урьдчилан сэргийлэх зөвлөмжийг баримтлан явуулна гэж зохион байгуулагчид мэдээллээ.