Баталсан хуваарийн дагуу албан байгууллагын удирдлагууд, ажил хариуцсан албан тушаалтнууд 7043-1111 төвд ажиллаж байна.



Энэ нь Төрийн үйлчилгээний нэгдсэн төвийн иргэдийн санал хүсэлт, өргөдөл, гомдлыг хүлээн авах 7043-1111 утасны үйл ажиллагааг сайжруулах, иргэн, захиргааны байгууллага хоорондын уялдаа холбоог бэхжүүлэх, иргэдэд тулгамдаж буй асуудлыг хүлээн авч, шуурхай шийдвэрлэх зорилготой.



Хуваарийн дагуу энэ долоо хоногийн Мягмар гарагт "Ховд АЗЗА" төрийн өмчит хувьцаат компанийн гүйцэтгэх захирал С.Сансархүү ажиллав. Тухайн өдөр нийт долоон иргэний санал хүсэлт, гомдол хүлээн авсан байна.



Тодруулбал:

-Авто замтай холбоотой гурван санал хүсэлт, гомдлыг хүлээн авч газар дээр нь шийдвэрлэн хариу өгч ажилласан байна Мөн халаалт дулаан, өдрийн эмчилгээ, газар олголттой холбоотой санал хүсэлт, гомдлыг холбогдох байгууллага, албан тушаалтанд шийдвэрлүүлэхээр уламжилсан байна.



Харин Пүрэв гарагт аймгийн Боловсролын газрын мэргэжилтэн, ахлах арга зүйч Д.Олонбаяр ажиллав. Энэ өдөр нийт таван иргэний санал хүсэлт, гомдол хүлээн авч ажилласан байна.

Тухайлбал,

-Ерөнхий боловсролын сургуулийн орчин, сургууль, цэцэрлэгийн үйл ажиллагаатай холбоотой ирүүлсэн санал хүсэлт, гомдлыг хүлээн авч холбогдох байгууллага, албан тушаалтнаас тодруулга авч тухайн иргэдэд хариулт өгч ажиллав гэж аймгийн Засаг даргын Тамгын газраас мэдээллээ.