Монголын Үндэсний бөхийн холбоо хоёр жил тутам “ЦОЛ ДУУДААЧДЫН УЛСЫН УРАЛДААН”-ыг зохион байгуулдаг уламжлалтай. Энэ удаагийн буюу зургаадугаар уралдааныг Ховд аймгийн Засаг даргын Тамгын газар, аймгийн Үндэсний бөхийн холбоо, Биеийн тамир, спортын газартай хамтран зохион байгуулж байна.
Өмнөх уралдаануудыг Нийслэлд зохион байгуулж байсан. Тэгвэл Ховд аймгийн Үндэсний бөхийн холбоо 2024 оны ажлаараа “АЙМГИЙН ШИЛДЭГ САЛБАР ХОЛБОО”-оор шалгарсан амжилтаа бататгаж энэ удаагийн уралдааныг орон нутагтаа зохион байгуулж байгаа нь бусад аймгуудаас анхдагч болж байна.
Уралдаанд 13 аймаг, нийслэлийн 20-60 насны 49 төлөөлөл оролцож байна. Гурван үе шаттай явуулах уралдааны шилдгүүдийг маргааш тодруулна.
Улсын уралдааны нээлтэд аймгийн ИТХ-ын дарга З.Эрхбаяр оролцож амжилт хүслээ.
Үндэсний бөхийн цол дуудаачид нь нэг ёсондоо Соёлын өв тээгчид. Цол хэрхэн дуудахаас тухайн бөхийн барилдааны гараа, дэвээ, алхаа гишгээ цаашлаад амжилтад нь нөлөөлж болно гэдгийг уралдаанд оролцогчид хэлж байлаа.
Мөн Цол дуудаачдын залгамж халааг бэлтгэх, харилцан туршлага солилцох, суралцахад энэхүү уралдааны зорилго чиглэж байгаа гэдгийг албаныхан онцоллоо.
