Аймгийн Засаг даргын захирамжаар байгуулагдсан "Ажлын хэсэг" 2024-2028 онд хэрэгжүүлэх үйл ажиллагааны хөтөлбөрийг боловсрууллаа. 

Хөтөлбөрт Засгийн газрын үйл ажиллагааны хөтөлбөр, орон нутгийн сонгуульд оролцсон намуудын мөрийн хөтөлбөр, мэргэжлийн байгууллага, иргэд, олон нийтийн саналыг тусган:

  

-Хүний хөгжлийн бодлого, 

-Эдийн засаг, дэд бүтцийн хөгжлийн бодлого, 

-Хөдөө аж ахуй, үйлдвэржилтийн хөгжлийн бодлого,   

-Хүний эрхийг дээдэлсэн засаглалын бодлого, 

-Байгаль орчин, ногоон хөгжлийн бодлого гэсэн 5 бүлэг, 29 чиглэл, 329 зорилттойгоор боловсруулжээ. 

Өнөөдөр /2024.11.27/ аймгийн Засаг дарга М.Амарсанаа ирэх жилүүдэд хийж хэрэгжүүлэх үйл ажиллагааны хөтөлбөрөө ИТХ-ын даргад өргөн барьж 12 дугаар сард хуралдах ИТХ-ын ээлжит хуралдаанаар хэлэлцүүлэн батлуулж өгөхийг хүслээ. 

-Хүний хөгжилд түлхүү анхаарсан,

-Бүс нутгийн хөгжил, иргэдийн амьдралд түлхэц өгөхүйц 10 томоохон төсөл хэрэгжүүлэхээр тусгаснаараа онцлогтой болсон. Тиймээс “ХУРДТАЙ ХӨГЖЛИЙН ЗАМ” хэмээн нэрлэж зорилтоо тодорхойллоо хэмээн хэлсэн үгэндээ онцоллоо.  

Мөн 2023 оны төсвийн гүйцэтгэл, 2024 оны батлагдсан төсвийн хэрэгжилтийн урьдчилсан дүн болон орон нутгийн 2025 оны төсвийн төслийг өргөн барив.

-Хуулийн хугацаанд багтаж үйл ажиллагааны хөтөлбөр болон ирэх оны төсвийн төслөө өргөн барьж буй аймгийн Засаг дарга М.Амарсанаа болон Ажлын хэсгийн хамт олон, ЗДТГ-ын хамт олонд талархаж байна. 

-ИТХ-ын Ажлын алба 12 дугаар сарын 04-ний өдөр ээлжит хоёрдугаар хуралдааныг зохион байгуулахаар төлөвлөн бэлтгэл хангаж байгаа. Маргаашаас /2024.11.28/ ИТХ-ын Зөвлөл хуралдуулна. 

Мөн хурлын дэргэдэх Хороодоор үйл ажиллагааны хөтөлбөр болон төсвийн төслийг хэлэлцүүлж төлөөлөгчдөд хүргүүлж ажиллана гэлээ.

Аймгийн Засаг даргын 2024-2028 онд хэрэгжүүлэх үйл ажиллагааны хөтөлбөр, ирэх оны төсвийн төсөл өргөн барих үеэр Засаг даргын орлогч, үйл ажиллагааны хөтөлбөр боловсруулах "Ажлын хэсэг"-ийн ахлагч Э.Уртнасан болон холбогдох хэлтсийн дарга, мэргэжилтнүүд байлцлаа.