Ховд аймгийн эмэгтэйчүүдийн зөвлөлөөс санаачлан Жаргалант сумын ахмадын хороо, Сүүн сэтгэл холбоо төрийн бус байгууллагатай хамтран ээжүүдийн  байгаль, эх дэлхийгээ аргадсан "СҮҮН ЦАЦАЛ" өргөх ёслолыг Баатархайрхан уулын энгэрт өнөөдөр зохион байгуулав. Энэ нь байгаль дэлхий, лус савдагуудаа аргадах зан үйл бол монголчуудын эртнээс уламжлагдан ирсэн өв соёл юм. Тиймээс ээжүүд, эхчүүд хамтран ийнхүү сүүн цацалаа тэнгэр хангайдаа өргөж, хур бороо гуйх зан үйл үйлдлээ.

Тус арга хэмжээнд салбар бүрийн төлөөлөл болсон 80 гаруй ээжүүд өөрсдийн сэтгэл бишрэлээр оролцсон байна. Аймгийн эмэгтэйчүүдийн зөвлөлөөс зохион байгуулсан сүүн цацал өргөх арга хэмжээнд оролцож байгаадаа ээжүүд талархалтайгаа байгаагаа илэрхийлж байлаа. Мөн тэдний зүгээс залуу бүсгүйчүүддээ тэнгэр хангайгаа аргадах энэхүү зан үйлийг дор бүрнээ өглөө бүр үйлдэж нарандаа залбирч сүү, цайныхаа дээжийг өргөж байхыг уламжилж байв.